Arsalan Darwesh:

لەیادی ١٠٠ی بڵاوبوونەوەی یەکەم شانۆنامەی کوردی..

گەرچی گرێدانی دەستپێکی بزاڤی شانۆیمان بە مێژووی بڵاوبوونەوەی یەکەمین شانۆنامەی کوردی، مشتومڕی زۆر هەڵدەگرێت و، ناکرێت پرۆسێسی نمایش و دەرکەوتنی شانۆی کوردی پێ دیاری بکرێت ، وەلێ ئەوەی ئاشکرایە و بەڵگەدارە: بوونی نواندنی میللی و جموجوڵی شانۆییە لە چەند شارێکی کوردستاندا بە چەندین ساڵ پێش ئەو ڕێکەوتە، کە لێکۆڵەرو نووسەرو ئاکادیمیستی بەتوانا (د.فەرهاد پیرباڵ) بۆ یەکەمین جار لەکتێبە بەنرخەکەیدا (مێژووی شانۆ .. لەئەدەبیاتی کوردیدا لەکۆنەوە تا ١٩٥٧) دا بە بڵاوبوونەوەی شانۆنامەی (مەمێ ئالان)ی ڕەوانشاد (عەبدولڕەحیم ڕەحمی هەکاری)لە گۆڤاری(ژین ژ ١٥،١٦) لە ساڵی ١٩١٩لە ئەسەتەمبۆڵ دەستنیشانکردووە. 
بۆیە بەدەر لە هەر فراوانبوونەوەیەکی کرۆنۆلۆژی تر کەزەحمەتە ئەم دەرنجامە زانستییەی (دکتۆر فەرهاد) تێبپەڕێنێت، وەک شانۆکارێک کە بۆ چوار دەیە دەچێت لەم بوارەدا کاردەکەم، بە دەرفەتی دەزانم لەم بۆنەیەدا وێڕای دروود بۆ یادی مامۆستا (عەبدولڕەحیم رەحمی هەکاری) و گشت رابەرو سەرمەشقانی ئەم هونەرە مەزنە لە شاعیران و نووسەران و مامۆستایانی پەروەردەکارو ئەکتەرانی پێشەنگ و کۆچ کردوو، بەڕوای دەزانم داوا لە تەواوی هاوپیشەو هاوکایەکانم بکەم بەوپەڕی رێزو خۆشەویستییەوە کە هەموومان ئەم بۆنە پیرۆزە بەهاداربکەین بە ڕامان و بەخۆداچوونەوەیەکی قوڵ و خاکەڕایانە سەبارەت بە دیدو کارکردن و پەیوەندییەکانمان لەگەڵ یەکتردا.. 
ئا،یزان دڵنیام سەرەڕای جیاوازی هزرو رووانینی هونەریی و شێوازو ستایلی کارکرنمان،دەکرێت بەرکەوتنەکانمان لەگەڵ یەکدا داهێنەرانەبن و بەئاراستەی جوانتر کردن و ئەکتیڤکردنی هونەرەکەمان بێت لەکۆمەڵگاکەماندا، ئێمە خەم و کارو خولیایەکی باڵا کۆماندەکاتەوە، ئەویش ئازادی مرۆڤ و خۆشنوودی ژیانیەتی، کەخودی هونەر و شانۆ دەبێت رۆڵی خۆی لەو پرۆسێسەدا تۆکمەتر بکات.. 
دروود بۆ هەر ئایدیایەکی جوان،هەر پەیڤیکی جوان ، هەر کارو داهێنانێکی تازەو هەر تەقەلاو بەخششێکی ناوازە.. دروود بۆ بوێری کچان و ژنانی بوێرو ئەفڕێنەرو شانۆکارانی رچەشکێن، بۆ نووسەران و وەرگێڕەکان و رەخنەگران و رۆژنامەنووسە هونەرییەکان.. سوپاس بۆ پشتیوانییە جددییەکان ، بۆ ئامۆژگا هونەرییەکان و مامۆستا بەڕێزەکان، بۆ دەزگاکانی چاپ و بڵاوکردنەوە، ئەوانەی هەمیشە لەخەمی دەوڵەمەنکردنی زەین و رۆشنبیریی ئەکتەرو دەرهێنەرو بەشدارانی ئەم بوارەن.. سڵاو لەو ئازیزانەی لەهەرکوێیەکی ئەم گێتییەدابن بیرو خامەیان لەلای شانۆ رووتەنەکانی وڵات و کارو پێشکەوتنی شانۆکارەکانی کوردستانە.. دواهەمین و بەهادارترین سڵاویشم بۆ (بینەر)ی شانۆیە لەکوردستاندا، ئەوبینەرە رۆشنبیرو شانۆدۆستەی کە لەهەموو هەلومەرجە سەخت و ناهەمووارەکانی ژیانی خۆی و باری سستی شانۆکەمان پشتی نەکردە هۆڵەکان و رەنجی بەبانەداین، لەکانگای دڵ و دەروونێکی پڕ خۆشەویستی و رێزو حورمەتەوە ئومێدمە هەمووتان لە کارو پرۆژەکانتاندا سەرکەوتووبن ئازیزانم..
هیوادارم ئایندەی شانۆ لەکوردستانداو ئایندەی گەلەکەمان رووناکترو پڕ دەستکەوتی شایستەو جوانتر بێت بۆ ژیانی خۆمان و نەوەکانی ئایندە… 
سەدەی دووەمی بزاڤی شانۆی کوردیتان لێ پیرۆزبێت
http://boukanshano.ir/wp-content/uploads/2018/02/0001.jpg

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

You may also like