بەنیازی سەفەرێکم
لە غوربەتەوە بۆ غوربەت
سەفەرێکی زۆر تایبەت
بۆ مەزرای شێخ ،بۆ زیارەتی
بۆلای دایکم
لە گۆڕستانی ،
شێخ ئەحمەدی هیندی,
نەوارێکی ڕەسوڵ گەردی و
دوو چەپک ڕیخانە و
ڕستێک مێخەک
دەخەمە سەر کێلەکەی پشتی سەری
بێزارگەردی حەیران بڵێ و
منیش دڵی پڕ حەسرەتم
هەناسەی تەنگ و
روحی بریندارو
زام و جەستەی پڕ ئازارم
دەکەمە بەستەی دوای حەیران
دەیکەمە ئاو
دەیکەمە گوڵاو
ئەیپڕژێنم بەسەر کێل و
خۆڵی سەرگۆڕو
دارسنەوبەرەکەی لای دامێنی
بەسەر کۆڵوانەو کڵاو بەستی
بن گەردنی
سەروبەستی پوڵەکادارو
فەقیانەی بەستراوی
ئاودامانی.
ئێستاش نەمزانی و نەشم پرسی
ئەوکاتی گوێت لەحەیران دەبوو
تۆ دەگریای ،
دەستپیخی سەدو یەک دەنیکت
دەخستە گیرفانی کەواکەت و
بەهیواشی دەستت دەبرد
دوگمەی ڕادوێت بادەداو
هەوایەک ڤۆلیۆمەکت زیاد دەکرد.
ئای دایە
منیش حەزم لە حەیرانە
منیش حەزم لەمردنە
ئەوکاتی حەیران دەڵێ
براینە برادەرینا
قەبرێکم بۆلێدەن لە سەر سنگ و بەرۆک و
نێوان مەمکۆڵانی یارێ
برایەنە برادەرینا ……. ئەوەدیسان حەیران دەڵێ….
سدیق عزیز
27.9.2020

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

You may also like