چەند وشەیەک لە خەمی شانۆدا ..

ئەرسەلان دەروێش

تصویر ممکن است موارد زیر را شامل شود: ‏‏۱ نفر‏، ‏‏‏‎‎suit‎‎‏ و ‏شب‏‏‏‏

لەنێوان ناعەدالەتييەك و ناعەدالەتييەكى تردا،

 لەنێوانى رووداوێك و رووداوێکى تردا،

 كاتەكە زۆر لەو ساتەوەختە كورترە ،كە (ماكبێس) تيايدا کەوتە نێو دوودڵییەوە، پێش ئەوەى خەنجەرەكەى لە جەستەى قوربانييەكانى نقوم بکات !

لەنێوان زامێك و زامێكى تردا، مەوداكە لە گلێنەى چاو گەلێك بچووكترە!

ئەوى ئەمئێستا لەسەر رووبەرى شانۆ گەورەکە روودەدات، بەو گەردەلوولە بێ بەزەییە دەچێت، كە لە داوێنيا گشت شانۆ بچووكەكان راپێچ دەكات و تێكڕاى ئەو شوێنانەى پانتاييەك  دەڕەخسێنن بۆ وردبوونەوەو تێفكرين لە ئايندەو لەچارەنووس ڕادەماڵێت..

پێ دەچێت ئەم هەلومەرجە حەتمى بێت و خۆ لێ پاراستنى مەحاڵ بێت! چونكە ئەودەمەى(ژيانى رۆژانە) نوقمی  رووداو و خوێن و كارەسات دەبێت ، ئیتر وزەى شانۆ لە باردەچێت و خواستى كۆمەڵگا بۆ بایەخدان بە (شانۆ) پاشەکشێ دەکات.

لەو دۆخدا رۆژگارەکە دەبێتە شانۆيەكى زيندوو، شانۆيەكى تراژيدى و زەمەنێكى ديار لەناو مێژوودا.

لەم جۆرە شانۆيەشدا، (وشە) (چارەنووسە) ، (كردار) (وەرچەرخانێكى راستەقينەيە) و هەريەك لە ئێمە مەحكومە بەوەى خۆى ناوەرۆك و نووسەر و ئەكتەر و بينەر بێت!.

ئەودەمە رووداوە سەختەكان هونەرى شانۆ روو بە رووى تەنگەژەیەكى بەهێز دەكەنەوە.

ئەو تەنگەژەیەش سەرلەنوێ گشت پرسيارە گەوهەرييەكان لەهزرى شانۆكاران دەوروژێنێتەوە:

شانۆ چييە؟ پێگەو و كاريگەريى لەكوێدایە؟ پێويستە هەڵگری چ بەهاو ئەرک و  پەيامێك بێت؟؟

ديارە ئەو شانۆكارەى پابەستە بە كۆمەڵگاکەیەوە، ناتوانێت (شانۆ) لە (پەيام)ەكەى داببڕێت.

چونكە دووانەيەكن پەێوەستن بەيەكەوە.

لەم سەردەمى گۆڕانکارییە خێرا و ناهاوسەنگەشدا، كە بە ئاشكرا نا عەدالەتى كۆمەڵايەتى و گەندەڵى و کارا نەبوونى ياسا و کۆڤید19و نەبوونی مووچەو دابەزین بەهای دراوو دەيان پرسى ترى ژياريى و نەتەوەيى شەوو رۆژی  لێ تاڵ کردووین.

چۆن دەكرێت، پەيامەكە لەدەرەوەى روو بە رووبوونەوە و هەڵوێست وەرگرتن پێوانە بكرێت؟!.

(شانۆ) بە چ سەنگێك ماهيەتى بەرجەستە دەكات، ئەگەر راستەوخۆ وەك تەورێك، قاوغەكانى ئەو ناعەدالەتيانە تێكنەشكێنێت و لێيان وەژوور نەكەوێت و نەبێتە كردار؟ كردارێكى راستەقينە لە ژياندا ،كە تواناى كاريگەريى و گۆڕانكاريى هةبێت؟؟؟؟؟؟؟!.

لەمێژووى دوورو درێژی شانۆدا، چەندين ساتەوەختى پڕ لە سەرسامى هەن، كە تياياندا شانۆ تواناى بەديهێنانى پەيامەكەى سەلماندووە و رۆڵێكى درەوشاوەى گێڕاوە، وەلی هەميشە لەو چركە ساتانەدا دوو مەرجى سەرەكى زەمينەى ئەو سەركەوتنانەيان رەخساندووە:

 يەكەميان بوێرى شانۆ بووە، سەبارەت بە رووخاندن و گۆڕينى بونيادى ناوەكى خۆى.

دووەميشيان لە دەستەبەربوونى كۆكەشێكى ديموكراسيانەى راستەقينەدا بەرجەستە بووە.

هەردوو مەرجەكەش يەکانگير و پێکەوە گرێدراوان، چونکە ناكرێت شانۆ بونيادى دەقگرتوو و نەزۆكى خۆى بگۆڕێت و وەك رووداوێك لە مێژوودا كارا و كاريگەر بێت ،ئەگەر  پانتاييەكى بەپيتى لە ئازادی و ديموكراسيەت بۆ مەيسەر نەبێت.

ئاخر شانۆ، هونەرێكە كۆت كردن لەناوی دەبات، گرنگ نييە ئەو كۆتە ئاوريشمى بێت(كاتێك شانۆ خۆى لە دەسەڵات مارە دەكات)، يان ئاسنين بێت(ئەو دەمەى دەسەڵات ئابڵوقەى دەدات و دژايەتى دەكات.)

گرنگ ئەوەيە شانۆ بۆ ئەوەى پەيامەكەى خۆى بە مەرام و ئامانج بگەيەنێت ، پێويستى تەواوى بە بوێری  هەيە.

 نەخاسمە لەو سەردەمەى كە پەشێوى و چەوساندنەوە و ناعەدالەتى لە ئارادابێت، ئەوەش كڕۆكى تەنگەژەکەیە.

ئەو تەنگەژەیەى گشت شانۆ چالاك و جدييەكان ئابڵوقە دەدات.

پرسيارەكەش ئەوەيە، ئايا چارەسەر و بەردەبازى دەربازبوون چييە؟

پێم وانييە، چارەسەرێكى ئامادەكراوى دەرمانئاسا لە ئارادا بێت.

لەراستيدا لە یەك دەروازەوە شانۆكەمان لەم هەلومەرجەى ئێستاى دەربازنابێت، بەڵكو بەكۆى ئەو ئەزموونە جدييانەى کە سەرەڕاى جياوازيى شێواز و رێڕەوەكانيان، بەدواى وەڵامى پرسيارە گەوهەریەكاندا دەگەڕێن و باوەڕيان بە كاريگەرى (پەيامى شانۆ) هەيە ، بەو خوێن گەرمی و کۆڵنەدانەی گەنجان و سەرکێشی خەونەهونەرییەکانیان ، بەدوورکەوتنەوەمان لەیەکتر شکاندن و یەکتر رووخاندن و خۆ بەزل زانین! بە بوژاندنەوەی زۆرێک لەئاکارە بەرزە هونەرییەکان.. دەکرێت شانۆ کارا بێت لەژیانماندا.

ئەرسەلان دەروێش

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

You may also like