100 ساڵ دوای هەڵگیرساندنی یەكەم چرای شانۆی كوردی لەهەولێر

(لە رۆژنامەی خەبات بڵاو بۆتەوە)

حەیدەرعەبدوڕەحمان                     Haeder Abdulrahman

تەمەنی شانۆی كوردی تەمەنێكی درێژ نیە بەبەراورد لەگەڵ زۆر لەوڵاتانی دەوروبەروێڕای ئەو هەموو تەنگژە سیاسی و ئابووری و كۆمەڵایەتیانەی بەسەر كوردستاندا هاتوون و بوونەتە هۆكار بۆ دروست بوونی هەلومەرجێكی ناسەقامگیر و نائارام بۆ شانۆ، وێڕای هەموو ئەو زەبرو زەنگە سیاسی و ئابووریی و كۆمەڵایەتیانەی بەچەندین شێوازی جینۆساید كردن لەسەر كوردستان هەبووە، بەڵام دەكرێ‌ بڵێین شانۆ لەكوردستاندا هێشتا بەخششی زۆری هەبووەو هەنگاوی باشی بڕیوە، ئەگەرچی تائێستا نەیتوانیووە ببێتە خاوەنی ناسنامەی تایبەتی و نەتەوەیی خۆی.

خۆشحاڵم بەوەی نیو سەدەی تەمەنم لەگەڵ ئەو شانۆیە بەسەر بردووە، زۆر لەقەڵبەزەو هەڵبەزەو هەڵكشان و داكشان و هەورازو نشێوی ئەو شانۆیەم بەچاوی خۆمەوە دیووە، چەند ئەوەندەی دووچاری سەختی و ئاڵۆزییەكان هاتبێ‌، هەرگیز بێ‌ ئومێد نەبوومە لەئایندەی ئەو شانۆیە، چونكە پێم وایە هەرگیز شانۆ نامرێ‌، چەند ئەوەندەی لاواز بێت

سەرەتایەكی تەقلیدی

پێش دروست بوونی شانۆ لەكوردستاندا، هەندێ‌ داب و نەریت و كەلەپووری فۆلكلۆری وەك (بووكە بەبارانێ‌، كۆسە بەبە،هەندێ‌ تقوسی ئایینی) كۆمەڵایەتی، هەبوونە، كە جموجۆڵێكی بەكۆمەڵ بووە، بەشیّوەی درامایەكی میللی، لە زۆر بۆنەی كۆمەڵایەتی پیادە كراون، تێیدا نواندنێكی بە كۆمەڵی رەمەكی ئەو بۆنانەی تێدا بەرجەستە كراون

ئەونمایشە میللیانە تاسەردەمانێكی زۆرو ئەنجام دراون و بەقۆناغێكی تەقلیدی ناودەبرێن .

شانۆی كوردیش وەك هەر شانۆیەكی دیكەی جیهانیی بەسەرەتایەكی تەقلیدی دەستی پێكردووە، هاوكوف بووە لەگەڵ زەمەنێكی دوا كەوتوو لەكوردستاندا، بەڵام هەرخاوەن ئارەزوو بووە بۆ ئەوەی ئەویش وەك گەلانی دنیا شانۆیەكی تایبەت بەخۆی هەبێ‌، بتوانێت بەزمانی زگماكی نەتەوەیی خۆیەوە گوزارشت لەكێشەو ئاریشاكانی خۆی بكات، خواستەكانی بەرجەستە بكات.

رووداوە مێژووییەكانی ئەو سەدەیەی شانۆی كوردی :

لەماوەی ئەو سەدەیەی رابووردوودا شانۆی كوردی بەچەند رووداوێكی مێژوویی دا تێپەڕیوە، كە هەریەكەیان گرنگی خۆیان هەبووە لەگەشە سەندنی شانۆی كوردی :

1.سەلاحەددینی ئەیوبی

لە بیستەكاندا یاخود دەقاو دەق، لەساڵی 1921 گەورەترین روداوی مێژوویی لەبواری شانۆ لەكوردستاندا سەری هەڵداوە، ئەویش دەركەوتنی شانۆ بووە لەهەولێر، هەرلەچوارچیوەی ئەو دەركەوتنەدا شانۆگەری سەلاحەدینی ئەیوبی، لەئامادەكردنی (نەجیبب حەداد) لەهەولێرنمایش كراوە، ئەم نمایشەش ئەگەرچی بەزمانی عەرەبی بووە، بەیەكەم هەنگاوی سەرهەڵدانی شانۆ لەكوردستاندا هەژماردەكرێت.

بە پێی ئەو قۆناغە شانۆییەی لەو سەردەمەدا باو بووە شانۆگەری سەلاحەدینی ئەیوبیش دەبێ‌ هەر ستایلێكی كلاسيكيانه ى هەبوو بێت، لەرووی نواندن و دەرهێنان و جلوبەرگ و دیكۆرەوە.

بەڵام گرنگی گەورەی شانۆگەریەكە لەلایەنە مێژوویەكەیەتی .

لەسییەكاندا شانۆ گەشە دەسێنێ‌:

شانۆی كوردی دوای لەدایك بوونی وردە وردە لەسییەكاندا پێ‌ دەنێتە قۆناغێكی ترو لەزۆر لەشارو شارۆچكەكانی كوردستان وەك هەولێرو سلێمانی و رەواندزو كۆیە و ئامێدی و ئاكرێ‌، بامەڕنی، دهۆك، بەشێوەیەكی بەربڵاو لەكوردستاندا پەرە دەسێنێ‌ .

لەپەنجاكان روداوی پەیدا بوونی ئافرەت لەشانۆی كوردی دا سەر هەڵدەدات :

1 .لەسەرەتای پەنجا كانیش دیسان روداوێكی دیكە لە شانۆی كوردی دا سەرهەڵدەدات و بۆ یەكەم جار ئافرەت دێتە سەر شانۆ لەبری ئەو پیاوانەی لەجیاتی ئافرەت نواندنیان دەكرد، خاتوو (نەرمین ناكام) و (بەدیعە دارتاش) لەسەر شانۆ نواندن دەكەن، ئەمەش قۆناغێكی نوێ‌ بووە لەشانۆی كوردی داو یەكێك لەگرفتە هەرە گەورەكانی شانۆی كوردی نواندنی پیاو بووە لەبری ئافرەت بەرەو چارەسەر كردن دەبات .

شانۆ لەگۆڤارو رۆژنامەكاندا :

روداوی دووەمی ساڵانی پەنجاكان دەركەوتنی ناوی شانۆو هەواڵەكانی شانۆو چەندین وتار دەربارەی شانۆ لەگۆڤارو رۆژنامە كوردییەكاندا سەریان هەڵدا، بەتایبەت لەرۆژنامەكانی ژین، ژیان، گۆڤاری زاری كرمانجی ، هەتاو ..

ئەم گۆڤارو رۆژنامانە رۆڵێكی گرنگییان هەبووە، لە بەدیكۆمێنت كردنی چالاكییە شانۆییەكان و گەشە سەندنی هوشیاریی شانۆیی لەكوردستاندا.

پیرەمێردی نەمر رۆڵێكی گرنگی هەبووە لە بڵاو كردنەوەی هەواڵە شانۆییەكان لەرۆژنامەی ژین و ژیان و لە پەراوێزی هەواڵەكانیشدا جار جارە سەرنج و تێبینیەكانی خۆی دەنووسی.

بۆیە پیرەمێرد خزمەتێكی بەرچاوی به شانؤ كردووه.

لە پەنجاكان و شەستەكان دروست بوونی قۆناغی یەكەمی شانۆی ئەكادیمی: بۆ یەكەم جار لەمێژووی شانۆی كوردی، وەك یەكەم هەنگاو بۆ دروست كردنی بناغەی شانۆی ئەكادیمی لەكوردستان، كۆمەڵێ‌ قوتابی، لەساڵانی پەنجاكان و شەستەكان لەئەكادیمیاو پەیمانگا شانۆییەكانی هونەرە جوانەكانی دا وەردەگیرێن، وەك هونەرمەندان: تەڵعەت سامان، ئەحمەد سالار، سەفوەت جەراح، فەرهاد شەریف، بەدیعەدارتاش، زوهێر عەبدولمەسیح، هاشم زەینەل، غازی بامەڕنی، سەباح عەبدولڕەحمان، سەعدون یونس، فەتاح خەتاب، پەیمان بەگۆك .

دوای دەرچوونیان ئەو دەستە قوتابیە ئەكادیمیانە كە دەگەڕێنەوە كوردستان، كۆمەڵێ‌ زانست و ئەزموونی شانۆیی لەگەڵ خۆیاندا دەهێننەوە و چەند تیپێكی نواندن دروست دەكەن، بۆ هێنانە پێشەوەی ئەكتەرو تەكاندان بەرەوتی شانۆیی لەهەموو بوارەكاندا ساڵانی ئاڵتوونی شانۆی كوردی:

سەرەتاكانی ساڵانی حەفتاكان بەهۆی رێكەوتنی نێوان شۆڕش و بەغدا، چوار ساڵی ئارامی باڵی بەسەر كوردستاندا كێشا، ئەمە بووە هۆی ئەوەی شانۆ لەكوردستاندا گەشە بسێنێ‌، لەبەرچەند هۆیەك :

1.كردنەوەی چەند پەیمانگاو ئەكادیمیایەكی هونەریی لەكوردستان و رووتێكردنی نەوەیەكی بەهرەمەند بۆ ئەو پەیمانگایانە.

2.دروست بوونی چەندین تیپی شانۆیی بۆ پێشكەش كردنی بەرهەمەكانیان .

3.دامەزراندنی كەناڵی تەلەفزیۆنی كەركووك، بۆ تۆماركردن و بڵاوكردنەوەی بەرهەمی

هونەرمەندانی كوردستان .

4 .دروست كردنی چەند هۆڵێكی شانۆیی لەشارەكانی كوردستاندا.

رێبازی واقیعی :

بە شێوەیەكی گشتی دەتوانین بڵێین كە شانۆی واقیعی سێیەكی رووبەری شانۆی كوردی داگیر كردووە، ئەم رێبازە لەسەرەتاكانی خەملانبوونی شانۆی كوردییەوە لەزۆر لەبەرهەمە كوردییەكاندا بەردەوامی هەیە و زۆرێك لەشانۆكارانی كورد لەسەدەی رابووردوو لە ئێستاشدا پیادەی شانۆی واقیعی دەكەن، لەبەركۆمەڵێ‌ هۆكار :

1.فۆرمی ریالیزمی كە هەر لە ناوەكەی دا دیارە، وێنەیكی جوانتر لەخۆی لەوێنەكانی ژیان بەرجەستە دەكات، بەمەش شانۆ دەبێتە باشترین گوتا بۆ ئاخافتن لەگەڵ بینەرو وروژاندنی .

2. دەق توخمی سەرەكییە لەشانۆی ریالیزمی و لەرێگەی دەقەوە دەتواندرێت گوتاری شانۆیی بەروونی بگاتە بینەر..

لەشانۆی كوردی دا بەتایبەت لەشاری هەولێر دەرهێنەرە شانۆكارەكانی ئێمە بەتایبەت تەڵعەت سامان، فەرهاد شەریف ، سەباح عەبدولڕەحمان ، سەعدون یونس زۆرانی تریش بایەخێكی زۆریان بەشانۆی ریالیزمی داوە، بەڵام ئەمە ئەوە ناگەیەنێت كەشانۆی كوردی تەنیا لەقاوغی شانۆی واقیعیدا خولاوەتەوە، بەڵكو بەچەندین فۆرم خۆی گۆڕیووە، بەتایبەت فۆرمی تەعبیری و رەمزی .

كە دەرهێنەر فەتاح خەتاب لە حەفتاكان و هەشتاكان رۆڵێكی بەرچاوی بینیووە لەو فۆرمە جیاوازانەی لە شانۆی رەمزی و تەعبیری لە شاری هەولێر لە رێگەی چەندین نمایش دروستی كردوون، لەوانە بەرهەمەكانی :

نەخۆشی ددان

ئەو كەسەی بوو بە سەگ

ئەی ئەو كەسەی لەوێیت

پیشانگا

سەیران

مام حەسەن دەگەڕێتەوە

داسەكەی شاسوار

زەنگی تەلەفون

وێنەیەك لە رابووردوو

شەو چەرە

تەوژمی نوێ‌ :

یەكێ‌ لەنیشانەكانی دەوڵەمەند بوونی شانۆ هەمە رەنگ بوونیەتی لەرووی ستایل و تەوژمی نوێ‌، هەندێ‌ جاریش قۆناغی شانۆو گۆڕان و بەرەو پێشەوە چوونی ئەزموون وا لەشانۆ دەكات، بەرگی خۆی بەشێوازێكی نوێوە بگۆڕێت .

لەشانۆی كورديدا چەند ستایلێكی نوێ‌ هاتنە ناو شانۆی كوردی لەوانە:

1.شانۆی ئەزموونگەری

كۆمەڵێ‌ لەو قوتابیە كوردانەی لە ئەكادیمیای شانۆ دەیانخوێند لە بەغدا، چەشنی نیگار حەسیب قەرەداغی ، شەماڵ عومەر ، دانا رەئووف و چەند قوتابیەكی تر دوای دەرچوونیان ئەزموونی شانۆی ئەزموونگەرییان هێنایە كوردستان ، كە ئەزموونێكی نوێ‌ بوو لە رووی فۆرم و نواندن و دەرهێنانی شانۆیی چەند وێنەیەكیان لە كوردستاندا نمایش كرد، وەك شانۆیی غۆریلا ، باخچەی ئاژەڵان، كەمانچەی رۆچێلد … ئەزموونەكە بۆ بینەری كورد ئەزموونێكی نوێ‌ بوو، بەڵام تەمەنی كورت بوو.

گۆڕینی فۆرمی شانۆیی

بەگشتی دەكرێ‌ بڵێین هەمیشە فۆرم لەدایك بووی ئاستی شانۆو قۆناغ و دەرهاوێشەكانیتی چەند ئەوەندەی شانۆ ئەزموونی نوێ‌ بەخۆیەوە ببینێ‌، ئەوەندە زیاتر بەدوای گۆڕینی بەرگی خۆی دا دەگەڕێت.

شانۆی تەقلیدی لەربووردوودا لەئاستی هزشیاریی و تێگەیشتنی خۆیدا بووە، تا شانۆ پێشكەوتنی بەخۆیەوە نەبینی بێت، نەیتوانیووە هیچ قۆناغێكی خۆی تێپەڕێنێ‌ .

بەڵام شانۆهەمیشە قابیلی ئەوەیە، ئەزموونی نوێ‌ وەرگرێ‌ و تەفاعول لەگەڵ ئەو ئەزموونە نوێیانەدا بكات بۆ گۆڕینی ستایل و فۆرم .

هەندێ‌ جاردەرهێنەرێكی بەتوانا دەسەڵاتی ئەوەی دەبێت، ئەزموونێكی نوێ‌ لەوڵاتێك بگوازێتەوە بۆ وڵاتێك تر، وەك ئەزموونی گواستنەوەی شانۆی وێنە لەلایەن سەلاح قەسەب لەیۆگسلافیاوە بۆ عیراق، ئەزموونی شانۆی ئاهەنگ سازی عەبدولكەریم بەرشید لەلایەن ئەحمەد سالار بۆ كوردستان .

شانۆی كوردی ئەگەر بیەوێت خوێنی خۆی بگۆڕێت، دەبێت كەسانی پسپۆرو خاوەن تیۆرو پراكتیكیان هەبێت بۆئەوەی كار لەسەر دروست كردنی فۆرمە نوێیەكان بكەن.

دروست كردنی فۆرمی نوێ‌ لە شانۆدا بە مانا هەڵوەشانەوەی فۆرمە كۆنەكە نیە، بە قەد ئەوەی دروست كردنی هونەرێكی تێری فرە فۆرمە لە شانۆدا، ئەمەش دەوڵەمەندی شانۆ دەگەیەنێت لە شانۆدا .

2 .شانۆی ئاهەنگ سازی

دوای ئەو ئەزموونەی ئەحمەد سالار لەشانۆی ئاهەنگ سازی لەكوردستاندا هێنایە كایەوەو پێشوازییەكی گەرمی لێ‌ كرا، هەولێریش كەوتە ژێ ئەو كاریگەرییە و چەند شانۆگەریەكی ئاهەنگ سازی لە لایەن شانۆكاران سەعدون یونس، هیوا سوعاد، ژیلوان تاهیر، پێشكەش كران.

شانۆی گواستراوە و گۆڕینەوەی ئەزموون

لەماوەی رابووردوودا شانۆی هەولێر سوودی لەئەزموونی شانۆیی هەندێ‌ لەو ئەزموون و بەرهەمی زۆرێك لە شانۆكارانی كورد وەرگرتووە، لەرێگەی گواستنەوەی بەرهەمی شانۆیی لەنێوان شارەكاندا بۆ نموونە :

لەكاتی سەرهەڵدانی شانۆی ئەزموونگەری لەكوردستاندا لەسەر دەستی كۆمەڵێ‌ لەشانۆكارەكان

هەندێ‌ بەرهەمی ئەزموونگەری لەوانەش شانۆیی ( غۆریلا) ی شەماڵ عومەر ) و ( باخچەی ئاژەڵان ) ی دانا رەئووف، (مۆزارت و سالێری) كەریم عوسمانمان بینی .

جگە لەچەند نمایشێكی دەرهێنەران جەلیل زەنگەنە، گەزیزە، كامەران رەئووف، فازڵ جاف، تەلارهیرانی، سدیق عەزیز، بارزان و چەندینی تر

گواستنەوەی ئەم بەرهەمانە ئاشنا بوون بووە بەبەرهەم و ئەزموونی یەكترو دەوڵەمەند كردنی شانۆی كوردی.

دوای 1975

لەساڵی 1975 كاتێ‌ حكومەتی بەغدا لەرێكەوتننامەكەی پاشگەز دەبێتەوەو سانسۆر دەخاتە سەر بەرهەم و شانۆگەرییە كوردییەكان وشانۆكارە كوردەكان هەوڵی كۆسپ نانەوە دەدات، لەبەردەم رەوشی بەرەو پێشەوە چوونی شانۆو فشارخستنە سەرشانۆكاران.

كەچی ئەو فشارە لەرووی لێپێچینەوە لەشانۆكاران و داخستنی هەندیِ نمایش گڕو تینی شانۆكارانی زێتر كرد بۆ روو تێكردنە شانۆی تەعبیریی و رەمزی و شانۆی مقاوەمەت بەتایبەت لای هونەرمەند تەڵعەت سامان .

زۆرینەی پانتایی شانۆییمان بۆ شانۆی كلاسیكی و واقیعی و ریالیزمی بووە، كە نزیكترین فۆرمی شانۆیی بووە لەئاستی هوشیاریی و هزری و دەروونی بینەری كورد، دەق گرنگی خۆی هەبووە چونكە

1 .كۆمەڵگای كوردی زێتر پێی وا بووە دەق ـ باشترین و نزیكترین ئامرازێكە بۆ گوزارشت كردن لە ئاوات و ئازارەكانی، بۆیە لەشانۆی واقیعی پتر بایەخ بەناوەرۆك دراوە.

2. بایەخدان بەشێوە بەزۆری لای شانۆكارە ئەكادیمیەكان پەیڕەو كراوە، بەڵام ژمارەیان كەم بووە، بۆیە شێوە نەیتانیووە بەسەر ناوەرۆكدا زاڵ بێت . تەنیا لەچەند حاڵەتێكدا نەبێت .

3.ئەم هاوكێشەیە وەك خۆی نەماوەتەوەو بەردەوام لەگۆڕان دابووە لەگەڵ پێشكەوتنی سەردەم و پێشكەوتنی تەكنیكی شانۆیی، بەتایبەت لای لاوە ئەكادیمیەكان كە پێیان وایە شانۆ چەند ئەوەندەی پێویستی بەناوەرۆكە، ئەوەندەش پێویستی بەفۆرم هەیە، لەرووی سینۆگرافیاو نواندنی تەعبیری و رەمزی، دەبێت ستاتیكای شانۆیی لەبەرچاو بگیرێت، بەتایبەت لای لاوەكان و ئەكادیمییەكانی شانۆ .

بەڵام ئەمە ئەوە ناگەیەنێ‌ كە شانۆی هەولێر لەرابووردوودا تەنیا شانۆی واقیعی هەبووە ، نەخێر زۆر نمایشی تەعبیری، رەمزی، ئەزموونگەری هەبووە.

دوای 1990

لەساڵانی نەوەدەكان و دواتریش، بەهۆی هەڵگیرساندنی شەڕو شۆڕو گرفتی ئابووری و كۆمەلاَِیەتی و نەمانی پشتگیریی دارایی حكومەت بۆ كەرتی شانۆیی، شانۆی جاد رۆڵی كەم بۆوە، زۆر لەشانۆكاران بەهۆی خراپی باری ئابووری و كۆمەڵایەتی دەستیان لەشانۆ هەڵگرت، كولێژو پەیمانگاكان لاواز بوون بەهۆی فەرامۆش كردنیان و كەڵەكە بوونی كێشەكانیان ..

بەڵام لەدوای كزبوونی شانۆی جاد دوو ستایلی شانۆیی بوون بەئەلتەرناتیف بۆ شانۆی جاد كە بریتی بوون لە:

شانۆی مۆنۆدراما

شانۆی سەر شەقام

ئەم دوو جۆرە شانۆییە بۆ خۆ رزگار كردن بووە لەخەرجیە شانۆییەكان، بە تایبەت شانۆی سەر شەقام و گەیشتن بە بینەر بەهەموو ئاستەكانیانەوە .

شانۆی سەر شەقام زۆر لە شارو شارۆچكەكانی كوردستانی گرتەوە، زۆرێك لە بۆشاییەكانی شانۆ بەمۆنۆدراماو شانۆی شەقام پڕ كرانەوە .

قۆناغێكی تر

لە بیستەكانی ئەم سەدەیەدا شانۆی كوردی بەگشتی لە تەكانی ئەوە دابووە ، ئەو قۆناغە چەق بەستووەی خۆی تێپەڕێنێ‌ ، وێڕای هەموو تەنگژەكانی دارایی و تەنگژەی كۆرۆنا زۆر هەنگاوی نەوعی هەنگاو بنێ‌ كە لەرووی تەكنیكی شانۆیی و لەرووی چەندایەتیەوە پێشكەوتنی دیارو بەرچاو بەخۆیەوە ببینێ‌ ، بەڵام ئەو ئاستە شانۆییە لەرووی جوگرافیای شانۆییەوە بەیەك ئاستی تەریبی بەڕێوە نەچووەو لەشوێنێكەوە گۆڕاویە بۆ شوێنێكی تر .

ئەگەرچی هەر هەموو شوێنەكان یەك كێشەیان هەیە لەرووی ئابووریی و لەژێر سێبەری یەك دەسەڵاتن

لەهەندێ‌ شوێندا وەك شاری سلێمانی، هەرگیز هۆڵی شانۆ بێ‌ شانۆگەری نابێت و بەرهەم هەیە بۆ ماوەی 30/ 40 رۆژ نمایش بەردەوام دەبێت، لەهەندێ‌ شوێنی تری وەك هەولێر ساڵێ‌ جارێ‌ بەرهەمێكی شانۆیی نابینی.

بەڵام هۆكار چیە؟

1.هەولێر لە بەرهەمهێنانی شانۆیی دا پشت بە بودجە دەبەستێت، بەڵام لەهەلومەرجی قورس و تەنگەتاوی ئابووری دا بودجە نامێنێ‌، لەو كاتانەدا شانۆش نامێنێ‌ .

2 . لەسلێمانی كەرتی تایبەتی دەوری خۆی دەبینێ‌ لەبەرهەم هێناندا، چونكە ئێستا لەسلێمانی شانۆ داهاتی هەیەو بینەر بەپلیت دێتە نمایشە شانۆییەكان .

كەچی تا ئێستا بەرهەمی شانۆیی لەهەولێر نمایش بەخۆڕاییە، بۆیە شانۆ لەهەولێر نابێتە خاوەنی هیچ سەرمایەیەك .

3.لەهەولێر قەیرانی هۆڵی شانۆیی هەیە، لەسلێمانی بەشێك لەو قەیرانە چارەسەر كراوە.

شانۆ لەشارو شارۆچكەكانی تر

زەرورەتی بینەر بۆ شانۆ لەزێدەبوون دایە، بۆیە شانۆكارەكانیش بەتەنگ بەدی هێنانی خواستی بینەرن

ئێستا تێبینی دەكرێ‌ چالاكی شانۆیی لە كەركووك وێڕای تەنگژە سیاسیەكانی بەردەوام لەگەشە سەندن دایە، هەروا لەدەربەندیخان و كەلار، بەڵام ئەم بزاڤە لەهەولێر هەستی پێ‌ ناكرێت .

ئەگەرچی هەولێر ئێستاش گەنجی شانۆكاری زۆر بەتوانای تێدایە، بەڵام زۆرینەیان بەهۆی ئەو هەلومەرجە سەختەی شانۆ دەستیان لەشانۆ هەڵگرتووە.

لەو ساڵانەی دوایی وێڕای مانەوەی ئاستەنگە ئابوورییەكان و بڕانی بودجە لەشانۆ حكومیەكان، شانۆكاران لەشارەكانی سلێمانی و كەركوك و هەندێ‌ لەشارۆچكەكانی وەك دەربەندبخان و كەلارو چەمچەماڵ، بۆ دۆزینەوەی چارەسەرو گەشە پێدانەوەی شانۆ، لەرێگەی سپۆنسەرو سەرمایەی كارەكانیان، قۆناغێكی نوێیان دەست پێكردەوە، هۆڵەكانی شانۆ پڕ بوونەوە لەبینەرو دەست كرایەوە بەئەنجامدانی فیستیڤاڵی شانۆیی .

بۆیە وا چاوەڕوان دەكرێت ئەو شەپۆلە نوێیەی شانۆ قۆناغێكی تر بەدوای خۆیدا بێنێت .

قۆناغێكی نوێ‌

شانۆ بەگشتی هونەرێكی جیهانیەو زمانێكی نێو نەتەوەیی هەیە، ناكرێت بەهاو هەیبەتی ئەو هونەرە بە پرسی نەتەوەیی، ناوچەگەرییەتی، یاهەر چەمكێكی تر بچووك بچووك بكرێتەوە..

ئێمە شانۆ لەهەر پارچەیەكی كوردستان بێت، بەموڵكی خۆمانی دەزانین، شانازی بەسەركەوتنەكانی دەكەین، هەناسەی سارد بۆ شكستەكانی هەڵدەكێشین، بەڵام ئاواتمانە بەردەوام هەر پارچەیەك لەگەڵ پارچەكانی تردا لەركابەری پیشوەچوون و سەركەوتن و داهێنان دابن، هەموو بەخششەكان بڕێنە سەرچاوە سەركییەكە كە ئایندەی شانۆی كوردییە.

ئێستا زۆرێك لەشانۆی كوردی بە فۆرمێكی مۆدێرن وهاوچاخانە كاردەكەن، گەنجەكان رۆڵی بنەڕەتی ئەو گۆڕانكارییانەی تێدا دەبینن، بە شێوەیەكی چاوەڕوان نەكراو بینەری تۆراوی جارانی شانۆ، بەپەرۆشەوە دەگەڕێنەوە هۆڵەكانی شانۆ، خەریكە شانۆ دەبێتە زەرورەت بۆ ژیان، شارو شارۆچكەكانی كوردستان لەئامادە باشی دان بۆ نمایش، ئایندەیەكی مژدە بەخش لەچاوەڕوانی شانۆی كوردی دایە.

دیدگاهتان را بنویسید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *

You may also like